विषारी दारू प्रकरणी कठोर कारवाईचे आदेश; आतापर्यंत 8 जण अटकेत – उपमुख्यमंत्री सुनेत्रा पवार यांची प्रतिक्रिया
पुणे, दि. 29 मे : पुणे शहरातील हडपसर तसेच पिंपरी-चिंचवड शहरातील दापोडी-फुगेवाडी परिसरात विषारी दारू सेवनामुळे 12 नागरिकांचा मृत्यू झाल्याची दुर्दैवी घटना समोर आल्यानंतर प्रशासनाने कठोर पावले उचलण्यास सुरुवात केली आहे.
याबाबत उपमुख्यमंत्री सुनेत्रा अजित पवार यांनी सोशल मीडियावर प्रतिक्रिया देत या घटनेबद्दल तीव्र दुःख व्यक्त केले आहे. त्यांनी पुणे व पिंपरी-चिंचवड पोलीस आयुक्त, राज्य उत्पादन शुल्क विभागाचे अधिकारी आणि स्थानिक प्रशासनाला या प्रकरणाच्या मुळाशी जाऊन सखोल चौकशी करण्याचे निर्देश देण्यात आल्याचे सांगितले.
सुनेत्रा पवार यांनी आपल्या संदेशात म्हटले आहे की, या घटनेची सर्वंकष चौकशी सुरू असून दोषींवर कठोर कारवाई केली जाईल. आतापर्यंत या प्रकरणात आठ जणांना अटक करण्यात आली असून पुढील तपास वेगाने सुरू आहे.
तसेच चौकशीअंती संबंधितांवर नियमानुसार गुन्हे दाखल करून कठोर कायदेशीर कारवाई करण्यात येईल, असा इशाराही त्यांनी दिला आहे.
दरम्यान, विषारी दारू प्रकरणामुळे पुणे आणि पिंपरी-चिंचवड परिसरात खळबळ उडाली असून मृतांच्या कुटुंबीयांवर शोककळा पसरली आहे. प्रशासनाकडून या प्रकरणातील संपूर्ण साखळी उघड करण्यासाठी तपास यंत्रणा कामाला लागल्या आहेत.
मुख्य मुद्दे:
🔹 हडपसर व दापोडी-फुगेवाडी येथे विषारी दारू प्रकरण
🔹 12 नागरिकांचा मृत्यू
🔹 8 जणांना अटक
🔹 पोलीस, उत्पादन शुल्क विभाग आणि प्रशासनाला चौकशीचे आदेश
🔹 दोषींवर कठोर कारवाईचे संकेत
– PC वार्ता | पुणे- पिंपरी चिंचवड ब्युरो 📰🚨